​​​ Azoka eta platera, batera!

​Bertako elikagaien salmentaz harago, horiek balorean jarri eta kontsumo jasangarria ardatz duten ekimenak antolatzen ditugu herriko eragileekin elkarlanean: sukaldaritza-ikastaroak, produktuen aurkezpenak, dastaketak, hitzaldiak...

​Gainera, Euskal Herrian elikadura-burujabetza ardatz duten hainbat proiekturekin saretuta gaude, eta honakoak dira partekatu eta bermatzen d​itugun irizpideak:

• ​Agroekologikoa. Produktu ekologikoak eta sasoian sasoiko elikagaiak lehenesten ditugu, ikuspegi eta eragin soziala kontuan hartuz.
• Bertakoa. Gertukoa lehenesten dugu, produktuek ahalik eta kilometro gutxien egin dezaten gure etxeetara iristeko. Tokiko garapena bultzatuz, Debagoieneko eta Euskal Herriko elikagaiak lehenesten ditugu.
• Justua. Ekoizleen bizi-baldintzak bermatzeko, prezio duinak bermatzen ditugu. Aldi berean, prezio horiek justuak izango dira kontsumitzailearentzat.
• Eraldatzailea. Egitasmoak bokazio eraldatzailea dauka, helburu baitu gure ohitura eta bizitzetan eragitea, kontsumoaz haragoko lanabesa izanez.
• Soziala. Proiektuak onura soziala lehenesten du diru-irabazien gainetik. Hala izan dadin, berme-sistema ezarria dauka.

​Elikaenea Bergarako Elikadura Mahaiak sortutako proiektua da, hain zuzen ere, aurrez aipatutako helburu guztiak betetzeko. Egitasmoaren gidaritza, aldiz, Ereindajan Kooperatibak  gauzatzen du, Bergarako Udalarekin sinatutako hitzarmena medio. Hortaz, Ereindajan da Elikaeneako denda, sukalde, bestelako zerbitzu eta Oxirondo azokako dinamizazio-lanez arduratzen dena.